Mahawani News - Leading Coverage Across Maharashtra & Chandrapur

सुधीर मुनगंटीवार यांच्या आदेशानुसार सुदर्शन निमकर यांच्या पाठपुराव्याने मंजुरी

मच्छिंद्र मत्स्यपालन सहकारी संस्था, राजुरा शिष्ठमंडळ निमकर यांचे आभार मानताना

• महावाणी : विर पुणेकर  
• २६ ऑगस्ट २०२४

राजुरा: राज्याचे वने, सांस्कृतिक कार्य, मत्स्यव्यवसाय मंत्री तथा पालकमंत्री ना. सुधीरभाऊ मुनगंटीवार यांच्या आदेशानुसार आणि माजी आमदार सुदर्शन निमकर यांच्या अथक प्रयत्नांमुळे राजुरा तालुक्यातील पाच तलावांचे खोलीकरण करण्यास अखेर मंजुरी मिळाली आहे. हे काम संपूर्ण तालुक्यासाठी महत्त्वाचे ठरणार आहे, कारण या खोलीकरणामुळे तलावांमध्ये पाणीसाठ्याचे प्रमाण लक्षणीयरीत्या वाढणार आहे. परिणामी, मत्स्यव्यवसायात वाढ होऊन शिंगाडा उत्पादनालाही चालना मिळेल.

भोई समाज, ज्यांचे जीवन जगण्याचे प्रमुख साधन मत्स्यव्यवसाय आहे, त्यांना यामुळे मोठा लाभ होणार आहे. या तलावांच्या खोलीकरणामुळे त्यांची उपजीविका अधिक स्थिर होईल आणि रोजगाराच्या संधी वाढतील. विशेषत: मत्स्यपालन व शिंगाडा उत्पादनात, जिथे तलावातील पाण्याचे महत्त्व आहे, त्या क्षेत्रात या निर्णयाचा मोठा परिणाम दिसून येईल.

भोई समाजबांधव आणि मच्छिंद्र मत्स्यपालन सहकारी संस्था, राजुरा, यांच्या संचालक मंडळाने दिनांक २५ ऑगस्ट रोजी माजी आमदार सुदर्शन निमकर यांची भेट घेतली. त्यांनी निमकर यांच्या प्रयत्नांची प्रशंसा केली आणि त्यांच्या समाजाच्या वतीने कृतज्ञता व्यक्त केली. हा निर्णय भोई समाजाच्या प्रगतीच्या दृष्टीने एक महत्त्वाचा टप्पा ठरेल, असे त्यांनी सांगितले. 

राजुरा तालुक्यातील हे खोलीकरणाचे काम केवळ मत्स्यव्यवसायालाच चालना देणार नाही, तर शिंगाडा उत्पादनालाही महत्त्व देणार आहे. तलावात वाढलेल्या पाणीसाठ्यामुळे पर्यावरणीय स्थितीत सुधारणा होणार आहे. त्याचबरोबर जलसंपदा जपण्यासाठी ही एक महत्त्वाचे पाऊल उचलले गेले आहे. पर्यावरणीय संतुलन राखण्यासाठी आणि स्थानिक पातळीवर रोजगाराच्या संध्या निर्माण करण्यासाठी या निर्णयाचे महत्त्व अनन्यसाधारण आहे.

सुधीर मुनगंटीवार यांच्या मार्गदर्शनाखाली व सुदर्शन निमकर यांच्या नेतृत्वाखाली हा प्रकल्प यशस्वी होईल, असा विश्वास मत्स्यपालन सहकारी संस्थेच्या सदस्यांनी व्यक्त केला आहे. या खोलीकरणामुळे तलावाचे क्षेत्र अधिक उपयुक्त होणार असून, स्थानिक शेतकऱ्यांना आणि मत्स्यव्यावसायिकांना या क्षेत्रात अधिक लाभ होईल. तलावांच्या खोलीकरणामुळे स्थानिकांच्या जीवनावर सकारात्मक परिणाम होईल, तसेच जलसंपदा व पर्यावरणाचे संरक्षण होईल.

#RajuraTaluka #LakeDeepening #FishingEmployment #SudhirMungantiwar #BhoiCommunity #MahawaniNews #SudarshanNimkar